قبل السقوط     يا ترحل... يا ترحل   بقلم أ.د اسامة رسلان امين عام النقابة العامة للاطباء 5/2/2011   العــند طبعـك وطبعــك الكــــبر طابــع فـــــيك والبغـى أصـلك وأصـــلك الظلــم موصــوم بيـــــك والشعب كارهـك وكرهــك فرض عين .. ما تْرُوُحْ يحنن عليك والكل فضفض وعبر وصرخ والشحــم فــــى ودنيــك ولا فيه بصـر ولا فيه بصيرة والمولــى غــشَّى عنيـــك والعين تتابعك والعند راكبـك ولا حس عندك ولا دم أحمر فيك بالكلمة سَّبك ... بالنكتة سلخك بالجزمة ضربك ... ولاشىء محّوق فيك نهب ونهبت ... سرقة وسرقت أموال غرفت ... ولا حاجة مالية عنيك ملك وملكت ... ظُلـم وظلمـت قتـل وقتلـت ... والدم ملــو إيديك لسنين طويلة ... خارب بيوتنا ماصص وريدنا ... ولا فى شىء يرويك خلاص طِهئنا .. وفاض بكيلنا وما عـدش ممكـن نصـبر عليك ريحنا وارحل ومعاك عصابتك ما هــو إن مغرتــش هانغوروك مُرّك ودقنا .. علقــم سقيتنا ورغـم ذلــك ... بنخـــيروك يا ترحـــل ... يا ترحـــل ولو مش ها ترحل ... راحين نرجموك وما عادش خايل .. شغل الحواه علـى شعـب ثاير ... بيركعـوك ترَّحل هامانك .. تضَّحى بقارونك تجنَّد عساكرك .. محال أرضى بيك عصابتك دى فاسدة .. وبيزينولك وإسمعهـا مـنى .. ها يضيعـوك وشعبه ده فايق ومخه ده رايق وآدى الطاولة جاهزة .. وها يقش بيك وشعبك ده مصرى .. ودماغه حصرى ولو إيـده طالــت .. ها يقطعـوك الشعب فاض به ولا عادش طايق منـاورة ثانيـة ولا كلمـة ليــك أوعـاك تفـكَّر ... أو يخدعـوك فيـه لسـه خمســة بيصدقـوك مصـيت دماهـم .. بليت لحاهم والكـل ساجـد يدعـى علــيك وأوعاك تهَّون بدعوى واحــدة مـن رب قـادر يقضـى عليـك وأحسبهـا بلـدى ... كـام من ولايا وأصحـاب مظالــم حسبن عليك اللى انتحر ... واللى مات م الجوع واللى اتظلم ... ولا اتحبس من سجانيك والّلا اللــى مــات غرقـان هربـان .. ما شاف أمل فى إيديـك غــير اللي  مــات محســور على نهب قوته وملُكه تحت عينيك واللى اتخطف ولدها .. واللى اتكسر قلبها واللى سنين عطلان ... مش لاقى حتى فريك شعبـك قتلته ... وهنته فى كرامته وضيعت هيبته ... ما عاد المليـك قالـولك تغـادر وغـيرها مفيش وإن لـم تغادر .. رواحنـا بعنيك وقبـل المغـادرة تحـل المجالـس دى أس المصايـب علينا وعليـك وجيـب ناس كريمة تمثل بلدنـا وروح كلابـك ... دى سعرانـه بيك وتلغى الطوارىء وتنزاح قيودنـا ونبدأهـا صفحـة مـع اللى يليـك ولازم محاكمة لكل اللى أفســد وكـل اللـى أجرم ومن ضللــوك وترجع فلوسنا اللى خدها الغيلان ونتغـدى بيهـم ونتعشــى بيــك وتنعم بلدنا بخيرها اللى عامــر ولا يخـده غاصـب ولا يجـرى ليك     *******     وعـن برلمانــك حديـثى يطول فجيعـة ... آلهـى ينكــد عليــك ها أقول كيف جاءوا ومن اللى جاب ومين اللى شَّرف ... وكيف بصموك وكيــف زوروهـا ومين اللى زور وخلوّا المزور .. يبوس بين إيديـك وقول يا جمال .. وبلطـج يا عـز وصـار برلماننـا عبيد حـزب ليك وشفنـا الحصانة لنـواب قروض وحوت للأراضى .. وسارق بنـوك وصبيـان عوالم .. وتجار حشيش ونـواب سوابـق فى عزبة أبـوك وهـات يا قضايا وقـرر يا نقـص وسـيد قــراره يراهـن عليـك وهبهب يا شعب وموت يابن جارية وطلـع لسانـك يا صاحب البوتيك يا راجل تدبر مفيش حاجه باقيـة ولو دام لغيرك ... ما كان جه إليك جمال مات سموم .. وفوق المنصة راح السادات وكان من نصيبك فيـس بـوك ليـك فليـه المكابـرة .. وليـه العناد وكـل العصابـة خـلاص نفضوك ولا مال هـا ينفـع ولا إبن حامى ولا عادلـى قاعد ... ومن الّهـوك وكل اللى نهبوا فى عزك وسلبوا فـى أول مواجهـة سريعاً باعوك وفى طيارتهم ... مع عائلاتهـم فـى خفيـة تواروا ... وما ودعوك جمـالك أنانى .. شريفك ناضورجى نظيفـك ملـوث .. وعـزك أفيك حبيبك سوابق وطالــق كلابـه وأول ماتنهش ... ما تيجى إلا فيـك     *******     ولك فى النهايـة بوّجه كـلام زمانك ده ولىّ ... خرج عـن إيديك ومصر استفاقت على إيد ولادها وبإيدين شبابهـا علـى ظلـم ليك يناير حداشر فى عشرين وخمسة شطبنـا عليكـم .. علـى جلاديك كتبنــا تاريخنـا بدم الضحايا وجـرح الصبايـا ودعـوة نسيك مسيحى ومسلم على يد واحـدة لا فيـه طائفيـة ولا فتنـة ليـك وعادت محبة .. وعاد الصديق وزالت همومنا ... مـن بعد ضيق أخــــــــــيرا .. ها ترحل ها أحبك .. هاتعند ها ألبك هتركب دماغك .. ها أكمل عليك     وفى السادسة والربع من مساء الجمعة 11/2/2011 سقط الفرعون لم يقتل .. ولم يمت .. ولم ينتحر ولكن بقى ... ليبقى عبرة لمن يعتبر (( اليوم ننجيك ببدنك لتكون لمن خلفك آية )) صدق الله العظيم